top of page

無糖/低糖烘培

以前做蛋糕嘅時候,總會有客人有特別需求嘅蛋糕或曲奇。有啲要無糖,有啲要無油,近年比較多小朋友係要食無麩質嘅蛋糕。我細個都係有敏感,對於雞蛋,牛奶,朱古力,海鮮都會有不良反應。所以對於有特別食物需求嘅客人,我會盡我嘅辦法去滿足佢哋嘅要求,因為細個知道戒口係有一定嘅難度。不過蛋糕曲奇始終唔係一啲必須嘅食物,所以有特別食物需求嘅人,一般都好少機會會食糕點。為咗滿足我嘅客人,我會好煩敢問得更詳細。

例如糖尿病人,我一般都會問佢哋係一型或者二型糖尿,因為兩者嘅分別,除咗對於糖嘅要求好嚴格,二型糖尿病患一般都係唔能夠食高脂肪嘅食物。亦有客人,因為做過某啲手術,身體係承受唔到油,食咗就好容易腸胃敏感。呢啲都要好小心處理。

我哋今日就分享吓可以烘培嘅代糖有乜嘢選擇啦~

一般代糖用於烘培產品,會有一個共通點:

- 顏色較淺,無咖啡色嘅效果。

- 烘培後成品無用真糖嘅組織咁綿密,鬆軟。

- 烘培成品體積會比較細,或者比較矮。

- 有時候使用過多會有回味。

- 烘培時間會較為縮短,建議於建議時間 5-10分鐘前檢查烘培成品是否已經煮熟。

稀少糖 Allulose


- 天然材料如水果,小麥,植物提煉出來。

- 相對一般嘅糖嘅4卡路里一克,稀少糖每克有0.2克卡路里。

- 不會被人體吸收,不會提升血糖,所以適合糖尿病患者使用。

- 用稀少糖烘培,食品會有較深啡色,而且會有一般糖嘅焦糖化嘅口味。

- 對於食品嘅組織,稀少糖同普通糖做出嚟效果相約。

- 呢個產品可以喺烘培用品店或者網購搵到,$120+ ~ $160 / 950g

- 不能用於做麵包酵母提升發酵效果。只能做甜味劑。

Equal Stevia



- 天然甜菊葉提取物,不會提升血糖,特別適合糖尿病患者使用。

- 由於 Stevia唔係糖,所以烘培出嚟嘅產品會比較白身,偏乾,用來做蛋糕都無一般蛋糕咁高。而且一般需要混合糖去烘培,先會有變啡同埋升高嘅效果。

- 不能用於做麵包酵母提升發酵效果。只能做甜味劑。

- 呢個產品可以喺超市搵到,約 $60/ 80g

羅漢果糖



- 羅漢果提取物,不會提升血糖,適合糖尿病患者使用。

- 不會被人體吸收,不會提升血糖,所以適合糖尿病患者使用。

- 可以代替糖去烘培,不過有啲牌子嘅羅漢果糖同砂糖相同比例,但係出嚟會較糖甜。

- 不能用於做麵包酵母提升發酵效果。只能做甜味劑。

- 呢個產品可以喺網購搵到,約 $60 / 150g

Splenda



- Sucralose 蔗糖素甜味劑

- Splenda 不會完全被人體吸收,不會提升血糖,特別適合糖尿病2型患者使用。

- 由於 Splenda 唔係糖,所以烘培出嚟嘅產品會比較白身,偏乾,用來做蛋糕都無一般蛋糕咁高。

- 烘培時,烘培時間有需要縮短。

- 不能用於做麵包酵母提升發酵效果。只能做甜味劑。

- 呢個產品可以喺 Citysuper 搵到,$118 / 275g

如果你想用嚟焗蛋糕嘅話,稀少糖會係首選,不過佢價格偏貴。如果做埋餡如慕斯蛋糕,就4款都適合哦~ 不過如果蛋糕係做比糖尿病患者嘅話,最後都係建議輕嚐會更好~

資料來源

750 views

Recent Posts

See All

Comments


bottom of page