越式湯河（Pho – 讀 fer) 我細個嗰時成日一家人去食，嗰個年代越式餐廳唔多 (或者當時太細個，根本唔知)，所以我地成日去銅鑼灣香河同尖沙嘴海洋中心金牛苑食，每次就算叫幾多嘢，都一定會有一碗熱辣辣，牛味濃郁嘅 Pho。
跟住大學年代，去左美國讀書。 每逢暑假去啊哥度我地一定會去三藩市附近嘅 Oakland 食（我呢生人食過最好味嘅） Pho (因為我未去過越南)。間餐廳係勁黑，勁 up dup 。 但係個大大碗 Pho 真係不得之了！餸多，大碗，湯底勁香！
Fast Forward 到返黎香港做嘢嘅年代，就一定係食青亭燕萍，兩間門口都有個好進取搶客嘅姐姐，大叫等候編號（聽聞好似係拆夥兩兄弟嘅舖）。 兩間都係好好食！記得嗰時成日飲酒，每次飲完酒嘅第二日宿醉，都要食一碗 Pho，啖熱湯吞落喉嚨度，個人醒一醒，個胃都即刻舒服翻曬。Um… *回味當中*
講返正題… 整越式湯河一直都係令我好卻步嘅美食，因為傳統湯底要餚製坐底 6-9個鐘，得兩個人食，又唔整得多，所以係無重入手。不過，我黎緊會試吓用壓力煲煮，睇吓時間可以縮短幾耐，到時候再同大家分享 （如果成功的話）。
不過，有一日係灣仔街市見到以下呢包牛肉湯河，買左返屋企試，真係好好味！唔洗15分鐘，就可以整到餐廳級數美食，放工返屋企先至整都唔係問題啊！
我以下嘅都唔係食譜啦，因為都係洗洗切切，焗個河粉！你只需要準備兩人份嘅材料包括：
打邊爐牛肉片 1包
牛丸 6粒
洋蔥 1個
莞莤 少許
蔥 少許
九層塔 按個人喜歡
青檸 1個
辣椒 1條
做法：
1. 煲一煲熱水，準備煮牛丸，同埋燙一燙牛肉片。
2. 莞莤，蔥，九層塔，青檸，辣椒洗淨瀝乾水份。莞莤，蔥，辣椒切碎。
3. 洋蔥切薄片，大概4-5刀份量。
4. 河粉內容全部倒入碗內，加400毫升熱水焗3分鐘。
5. 放上其他配料就可以食得啦～
想第一時間睇到更多更新，記得 Like 我個 Facebook Page 同 Instagram 啦～
Facebook： https://www.facebook.com/goinbacktobasics/ Instagram: https://www.instagram.com/back2basicsss/
Commentaires