top of page

新豬肉生煎包

老公好鍾意食生煎包,但我總係覺得出面食嘅生煎包,見佢哋倒一碗一碗嘅油入去煮,見到都打冷震。所以的起心肝,學點樣整,就可以整一個較少油嘅版本。加埋新豬肉整,連膽固醇都可以飛起!實在食得開心又放心。

第一次整嘅時候,唔係好識拿捏個皮放置嘅時間,搞到啲包未埋曬餡,就已經發到好大,蒸完出嚟個包好多泡泡,好唔靚,不過都算好好味。第一次整嘅時候,用左一半真豬肉,一半生豬肉,所以雖然唔靚,但係味道係 OK 嘅。


第一個係摺面向上,第二個係摺面向下。不過兩個都發得過咗龍,又唔識包所以好醜怪。

今次盡量快手快腳,可能已經有過一次經驗,已經無咁騰雞啦。今次個皮幾乎唔洗用粉都可以碌一個唔錯嘅皮出嚟,唔黏手,比第一次容易處理好多了。豬肉今次全部都用新豬肉。因為屋企得韭菜,所以用埋佢,雖然韭菜唔係一般生煎包嘅餡料,但都好好味,不過係有啲似餃子嘅感覺,都係用大蒜會好啲!



材料:

中筋麵粉1 120克

滾水 60克

中筋麵粉2 180克

酵母 3克

發粉 1克

室溫水 90-100克

新豬肉 230克

蔥 1 條

大蒜 半條

鹽 半茶匙

生抽 1茶匙

糖 半茶匙

麻油 半茶匙

脆皮底

水 80克

粟粉 1.5茶匙

做法:

1. 中筋麵粉1加入滾水,拌至滑身,放一邊。

2. 中筋麵粉2加入酵母,發粉,室溫水,拌勻, 揉至光面。靜置 15分鐘。



3. 新豬肉加入醬油,麻油,鹽,糖,(如果用真豬肉加少少水)。用筷子拌勻之後向一個方向攪至個肉比較黏嘅感覺,放雪櫃雪 30 分鐘。



4. 蔥同大蒜切細粒。

5. 將兩個麵團搓埋一齊, 靜置一陣。(處理豬肉嘅時間)



6. 豬肉取出,加入部分蔥同所有大蒜粒拌勻。

7. 麵團分16份。

8. 將麵團壓平,將肉包入去。將佢捏埋一齊。當包好曬嘅時候,一開始包嘅應該已經少少發起咗。



9. 平底鑊加油,熱嘅時候轉細火,落生煎包。加入脆皮底嘅漿,個包下面會有好似日式餃子個塊脆皮咁樣。

10. 上蓋煮 6分鐘。之後開蓋煎到包嘅底部上色就可以上碟。

11. 一次煎8個,剩低嘅可以放冰箱雪硬下次食。

 

Tips:

- 用新豬肉嘅好處係佢感覺好似肥肉咁,有黏埋一齊嘅作用。所以如果落較瘦嘅豬肉去整呢個餡,可以加新豬肉落去做個 juicy / 黏嘅效果。

- 我用厚底嘅不鏽鋼平底鑊,凍鑊用硅膠掃掃一層油上去(應該連一茶匙油都無),中火加熱 2 分鐘,轉細火之後就落生煎包。之後全程都係用細火去煮個生煎包)


呢個係我朋友送比我嘅油掃,每次煮飯都可以控制落好少油但又唔痴底了


 

 

想第一時間睇到更多更新,記得 Like 我個 Facebook Page 同 Instagram 啦~

78 views

Recent Posts

See All

Comentários


bottom of page