top of page

廚師機點揀?



我見好多人喺煮食 group 裡面會問邊款廚師機好。我覺得點樣為之好,其實好個人嘅,視乎你點樣用,你要佢做出嚟嘅效果係點樣。好似有人鍾意用 Android, 有人鍾意用 iOS咁,你無對比過,其實好難去比較。

我就一定係 Kitchenaid嘅 fans。 因為我同時間一齊用過兩款 Kitchen Aid (升降款&抬頭款)同埋一部 Bosch Mum,先講 KitchenAid 升降款同抬頭款。

抬頭款:

· 如果你屋企無位,或者你好想要特別色嘅話,當然係選擇抬頭款色比較適合。

· 抬頭款仲有玻璃/不鏽鋼碗比你揀。不過雖然有得睇住整嘢好過癮,但係個玻璃碗都係幾重,放咗材料 / 洗碗 / 晾碗時較重都係要考慮因素之一。

· 因為抬頭款個摩打同機身只係用一條 pin 去連接,所以日子耐咗(以一日用佢幾個鐘,一星期用6日),條pin會鬆少少,個機頭就會左右搖擺,特別係用嚟整麵包呢啲較硬嘅食材。


升降款:

· 以前喺公司開工用,對外觀要求並唔高,喺上海街買都係買白色最普通嘅升降款,價格會比較平,而且 5L 都好夠,可以整到好多嘢。

· 升降款個摩打係連住機身,所以唔會有機頭鬆嘅情況(經過長時間使用,即一日用佢幾個鐘,一星期用6日)鬆嘅應該係升降個較位。(可以睇睇下面嗰條片)

· 如果經常使用,而且經常整麵包嘅,會建議買升降款色,會比較耐用。

Bosch Mum:

當時我喺 Sogo 感謝祭比 Bosch 嘅配件吸引咗我,所以我就買咗佢返黎,放喺公司用,去取代部抬頭款 KitchenAid。呢部機個打蛋頭唔係好掂到個底,即係我用嚟打牛油要成日刮底 (呢個係少事),不過打蛋白嘅話,就會有底部打唔起嘅問題。本來我都覺得無乜嘢遮,但一個小插曲令我即刻賣咗部 Bosch, 話說我有一個客人非常喜歡食我哋嘅蛋白果仁脆餅 (Meringue 餅)幾乎隔幾日就會嚟買一包。有一日我兩部 KitchenAid 都忙緊整蛋糕,我就用 Bosch 嚟打我嘅蛋白,做我個蛋白餅,放咗出去賣。過咗幾日呢個客人反映返比我知,話我個蛋白唔同咗,同以前口感唔一樣了,比以前實,組織無咁多窿。自此之後,呢個客人無再買我哋嘅蛋白餅。(呢個客人根本唔知道我換咗機做同一個食譜,佢嘅答案反映咗好真實嘅狀況。)

而且當時我完全無接觸過整麵包,我有一日想整麵包,我個同事就幫我搞。我見個機頭打麵糰嘅時候,比起我個 KitchenAid 抬頭款更搖。所以,最後我選擇同佢講拜拜,之後買左部新嘅 5L 升降款。

Watt 數比拼:

如果淨睇單一數據,Kitchen Aid 好似得 350W 係弱啲嘅感覺,其他牌子成 1000W~1700W (Bosch / Kenwood)。咁係唔係 KitchenAid無咁好力?其實功率 (W, kW) 呢個係輸出能量。扭力係一個力量。

呢個 Watt 數同埋扭力嘅問題,我同老公講起,佢好快就比咗一個簡單易明嘅答案我。呢度都可以同大家分享。我哋用法拉利同埋 Land Rover 比較,法拉利嘅馬力超勁,輸出能量好高,達到更大嘅最高極速。Land Rover馬力無法拉利咁大,但係佢扭力好勁,所以佢爬山好叻。其實每一步廚師機嘅功率,齒輪唔一樣,齒比唔一樣(齒比越細,轉動圈速越多速度越快。齒比越大,扭力越大),令到扭力(torque),力量(power)唔一樣。所以單純睇功率,係唔可以作準則。Kitchenaid 80多年來都係已 Stand Mixer 為主打,理應佢嘅摩打有一定嘅肯定先可以同一個產品出咁多年。當然,新嘅產品一定會有更優越嘅機件。

我都係用過三部,兩個牌子嘅廚師機,只能為呢兩個做對比。所以如果你對你嘅成品有特定嘅要求,可以去一啲大型百貨公司,睇佢哋嘅 demo 而去決定咯~

976 views

Recent Posts

See All

Comments


bottom of page