top of page

屋企大清潔,洗走發毛致敏源。

天氣越來越熱,有時又連續曬幾日,有時落雨連續落幾日,加上我屋企特別濕,又好大塵,莫講話我屋企啲花花草草有陣味,我屋企唔同嘅地方都開始有啲唔應該有嘅味道或者每當我個女嘅皮膚又開始變紅,我自己就鼻涕長流嘅時候。(雖然朋友介紹之後,我買左個 airvida用,雖然喺室外作用唔大,但當我喺室內嘅時候,的確係幫到手。)就要徹底嚟個大清潔!清潔完嘅第二日,真係無再狂流鼻涕之餘我個女塊面又唔紅啦~

重點清潔嘅東西包括:

1. 冷氣機

2. 抽濕機

3. 同沙發

4. 浴室

5. 廚房晾碗架

6. 吸塵機

7. 毛巾


1. 自己清潔冷氣機

我哋屋企一般都會有兩個人同埋真係好熱先開冷氣。同埋夏天夜晚訓覺會開冷氣。其實每次熄冷氣嘅時候,間房同間屋回潮嘅時候真係會特別濕,而且會有啲味,有時候濕到連衣櫃門,地磚都會有層水珠咁濕。但最恐怖嘅其實就喺冷氣機嘅冷凍風葉同埋隔塵網上面好重嘅濕氣。如果平時熄冷氣想留住啲凍氣係室內嘅人(包括我以前),其實個冷氣機裡面無辦法吹走啲濕氣,日復日,好似夏天日日著住同一件件衫出街咁,又濕,又吹唔乾,又濕,跟住就真係會滋生細菌,好 up臭。就算一個月洗一次隔塵網都無補於事。

雖然市面上有啲冷氣機泡沫清潔劑,我買過一樽,但一年只會用一次,所以都用左好幾年,因為唔太想用好多化學嘢。凡任何瓶身指示一定要喺空氣流通嘅地方/開陽地方使用嘅任何噴劑,我都覺得越少用越好。特別香味好重嗰啲我會特別驚。不過今日我就用咗佢,開行風扇,開行窗,同佢死過!

先用吸塵機吸乾淨表面塵埃,之後噴上清潔劑,醃完部機後,用牙刷擦完,再用乾布抹乾。等二十分鐘後開機等啲香味吹咗出嚟先至熄機。夜晚再開就唔會咁多化學嘢係間房陪我訓覺啦~不過都係嗰句,呢個都只會一年洗一次,所以都係乖乖地經常保持通風同埋定期(一個月)清理隔塵網同掃冷凍風葉。




2. 洗抽濕機


因為我家小朋友好皺皮,所以經常會開住抽濕機。除咗秋天冬天唔開始之外,幾乎一開始潮濕,就會開到乾燥季節。但其實,抽濕機一路抽濕嘅同時,佢嘅隔塵網係好濕好多霉菌。水箱如果一個月唔洗一次,裡面好多細菌好 slimy 好似鬼口水咁。但因為個水箱設計都係就返部抽濕機,所以好多窿窿啦啦其實係無從入手,就算用刷都未必刷到。所以我通常都會落一層蘇打粉,加入溫水,浸泡一陣,再加半杯醋入去。就係好想佢有起泡嘅效果,其實會將好多噁心嘅鬼口水咋~~出嚟。跟住,就係俾心機刷乾淨,最後啲極細嘅空隙,我會用個 water pick 水牙線去噴佢。(但真係好容易會濺到,所以如果你真係好驚呢啲污糟嘢,可以帶手套,帶眼鏡去洗。或者沖涼嘅時候先洗,洗完乾脆沖涼就唔怕污糟啦~)洗乾淨之後,晾乾先至安裝返落去個機身度。


隔塵網最好用吸塵機吸走曬啲塵,再洗個網。今次隔咗兩個月先記得洗,個網都已經有一點點霉菌。所以我就灑咗啲蘇打粉上去,再噴醋上去,等10分鐘,佢起完泡泡,用水一沖多數好乾淨,如果都未洗走啲點點,可以重複一次,最後用刷擦完先再沖水就應該ok了~

然後就係清潔埋個風葉,都係用牙刷邊刷邊吸走刷出嚟嘅嘢。

最後用吸塵機吸走四周圍(包括底部)嘅塵,再用布抹乾淨就大功告成!

3. 吸塵瞞



a. 沙發– 較早前都係 Facebook 分享過快速乾洗沙發,就係灑上蘇打粉係布沙發表面,等30分鐘先至吸塵,呢個方法連毛髮都會容易吸走之餘,會去除一啲味。

b. 床 – 同沙發一樣,灑上蘇打粉,等 30分鐘再吸塵。

4. 洗浴室

浴室應該係全屋最濕悶嘅地方。特別係落雨天,一個禮拜唔乾爽,就會見到浴室角落開始有漬,即刻就要 KO 佢㗎啦!

同樣都係淋濕浴室,灑上蘇打粉,等 30分鐘,再噴醋,之後刷吓就可以沖水啦~

浴室塊勁多水漬番梘漬嘅玻璃都有兩個推介嘅方法,兩個都會有 “cha ching” 嘅效果~

1. 用一杯醋加一杯洗潔精,加入噴壺,噴上玻璃面,等3 0分鐘,用海綿打幾圈,沖水就會好乾淨了。

2. 另外一個就要用啲力氣,就係先噴一層醋,然後用個洗碗海綿加蘇打粉去打圈jut走佢。

5. 廚房晾碗架

呢個地方都係好多霉菌孕育嘅地方。雖然每日洗完都會望到佢,不過有時候邊位或者死角位都係比較難睇到而去會發毛嘅地方。如果擦得走緊係最好啦,如果比較難處理,可以係發毛嘅地方噴上啲醋,等一個鐘,再用毛巾浸完熱水去抹走啲醋同毛啦~

6. 吸塵機

呢啲咁濕嘅天氣,最好一個月清理一次吸塵機,更換吸塵袋。可以洗嘅配件都洗吓佢,晾乾。咁樣唔會每次吸塵嘅時候都聞住一陣陣除啦~

7. 毛巾

雖然毛巾應該日日換,但有時候真係唔會咁乖,會用兩至三日先至洗。但因為毛巾多數都會比較厚,比較難乾。同埋成日會抹我哋皮膚分泌嘅油,頭油等等,所以佢會有味都唔出奇。每個月可以幫佢做一次深層清潔。如果你地平時用凍水洗毛巾嘅話,一個月可以用一次熱水洗,加一杯醋,半杯蘇打粉。咁樣洗完啲毛巾會更鬆軟,更 fresh 架~

41 views

Recent Posts

See All

Comments


bottom of page