top of page

【Blessings Cakes 系列】唧花牛油曲奇

好幾年都無整呢個曲奇了,最近有朋友仔想要食譜,所以乾脆拍條片比佢!整完之後就分享曬比身邊嘅朋友lu~


記得嗰時有一個客人我對佢印象特別深刻,因為佢話好怕油膩所以唔肯買呢個牛油曲奇,我就

建議佢乜都試下,唔鍾意先算咯,唔好走雞嘛。之後佢試完,就話我個曲奇“鹹嘅”。嗰日,佢的確買咗另一款蛋白果仁脆餅。但往後嘅日子,佢入親嚟都買咗呢個鹹嘅牛油曲奇啦 😂😂😂!!





材料:

金桶牛油 225克

糖粉/糖霜 56克

低筋麵粉 168克

粟粉 56克

雲尼拿油 1/4 茶匙

做法:

1. 糖粉過篩,備用。低筋麵粉,粟粉,過篩備用。

2. 將金桶牛油打發(約兩分鐘),加入糖粉,打至體積變大1倍,顏色變乳白/粉黃色。

3. 加入雲尼拿油拌勻。



4. 此時預熱焗爐,上下發熱 180度/對流風 160度。

5. 將低筋麵粉,粟粉一次過倒入,用切嘅方法將麵粉拌勻(約1分鐘)。



6. 準備1M唧嘴,放入唧袋內,加入曲奇底,用膠刮將曲奇底盡量向唧嘴方向推。



7. 準備已經放焗爐紙嘅焗盤,將曲奇唧盤上,曲奇與曲奇中間預留大約 1寸空間。(可以參考影片方法)



8. 放入焗爐內焗 13分鐘,(中間焗盤前後對調)然後檢查是否有啡邊,有啡邊就代表可以出爐了。 放放涼架上放涼,涼咗就要即刻密封包裝,唔係就會受潮啦。



常見問題

問題:點解曲奇焗完會瀉開曬/好實?

可能性有幾個:

- 爐溫唔正確,以致曲奇未能定型,但牛油已經開始溶同埋瀉。

- 牛油打發唔夠,唔夠企身。

- 粉太少,油太多,所以要調較份量

- 有可能拌麵粉時拌太耐,或者手法未理想,將空氣都排走曬,所以會實

問題:金桶牛油用唔曬點處理?

答:除非你開完第二日就要用完,加上你室溫溫度好低,否則都會建議放雪櫃。罐頭本來係高溫處理/無菌/真空,一但打開左,接觸空氣,細菌,而一般細菌喺 4.4至60度溫度繁殖速度以倍數激增。正如你雪櫃裡面舊牛油,你用完都會放返入雪櫃,唔會放室溫等下次用一樣。所以最好用完包好,放雪櫃儲存。

問題:放完雪櫃會唔會無咁滑?

答:只需要用之前將佢打發返,佢就同新鮮開罐嘅質感一樣了,唔洗擔心。

問題:呢個食譜係唔係一定要用金桶牛油?

答:唔係啊,唔同牛油都可以做。不過都會建議選擇一啲比較香奶味嘅牛油。有啲較平價嘅牛油,係無乜味,整出嚟無咁香架。每款牛油/麵粉做出嚟都係有偏差的。

問題:咁呢款曲奇用咩嘢麵粉?

答:以前開店用日本月桂冠麵粉做曲奇。

問題:糖霜同糖粉係唔係兩樣嘢嚟架?

答:兩個都係同樣嘅嘢,英文名都係 powdered sugar, icing sugar。香港進口嘅糖粉,都係會加做粟粉入去防止糖粉結粒。

問題:係唔係所有焗爐都係焗13分鐘就得?

答:唔係啊,唔係所有焗爐都一樣,所以建議試新食譜,提早幾分鐘去檢查,之後每兩分鐘檢查一次,直到熟透,記得 Mark低呢個時間,呢個就係你焗爐同呢個食譜嘅專有煮食時間啦~


問題:焗爐溫度點樣先準呢?

答:可以參考https://bit.ly/3dTxFVY


問題:點解行對流風要減20度?焗爐上下發熱同對流風嘅分別喺邊?

答:可以參考https://bit.ly/2OfXi96


問題:牛油打幾耐先可以?

答:其實你可以按住牛油一路打發嘅體積同埋顏色嚟判斷仲需唔需要打,下圖顯示咗打 30秒,兩分鐘,四分鐘,六分鐘,八分鐘嘅顏色分別。越淺嘅顏色,代表約多空氣入咗去。因為每款牛油本身嘅顏色深淺都唔一樣,所以自己留意吓你嘅牛油有變淺同埋體積變大,即係打發得唔錯,打到無誤會再淺色,唔會再大,就係飽和咗啦。


問題:係唔係一定要好似你咁用1M嘴同埋唧三層啊?

答:當然唔係啦!最緊要自己整得開心,先會繼續整,你鍾意幾多層,或者唔同形狀都可以。不過焗嘅時間就會有分別。至於用 1M嘴,係因為我用過唔同嘅花嘴,呢個嘴唧出嚟喺最分明,所以我鍾意用1M。有啲向內灣嘅唧嘴如果唧我呢個方法,個紋路無咁出咁解遮~




想第一時間睇到更多更新,記得 Like 我個 Facebook Page 同 Instagram 啦~


1,176 views

Recent Posts

See All

Comentários


bottom of page